"Мнение Патриарха Никона о Соборном Уложении..."

Предисловие, подготовка текста и комментарии Г.В. Талиной

"МНЕНИЕ ПАТРИАРХА НИКОНА О СОБОРНОМ УЛОЖЕНИИ (1) …"
(Из ответов боярину Стрешневу)

Публикация по книге: Российское самодержавие первых Романовых / Сост., предисл., комм. Г.В. Талиной. / Под ред. С.В. Перевезенцева. М., 2005. С. 175–206. Подготовка текста и комментарии — Г.В. Талина.

<…> Разсмотри, лукавый совопросниче (2), ослепление умом, и зде царское повеление и совет святейшаго патриарха с митрополиты и apxиeпископы и епископы и со всем Освященным собором и приговор государевых бояр и околничих и думных людей. Велено написать из правил святых апостол и святых отец и из градских законов греческих и прежних великих государей царей и великих князей Российских и отца его государева блаженныя памяти великаго государя царя и великаго князя Михаила Феодоровича всеа России указы и боярские приговоры с старыми судебниками справить (3) и ни в чем же отменно. А на которые статьи в прошлых годех прежних государей в судебниках указу не положено и боярских приговоров на те статьи не было и те бы статьи по тому же написать и изложить по ево государеву указу общим советом, а не новыя законы вводити. И чтоб Московскаго государства всяких чинов людем от болшаго и до меншаго чину суд и росправа была во всяких делех всем равна, а не патриарху, и митрополитом, и apxиепископом, и епископом, и архимандритом, и игуменом, и всему Освященному собору. А указал государь царь то все собрать и в доклад написать бояром князю Никите Ивановичу Одоевскому с товарищи (4), а он князь Никита человек прегордой, страху Божия в сердце не имеет и Божественнаго Писания и правил святых Апостолов и святых отец ниже чтет, ниже разумеет и жити в них не хощет и живущих в них ненавидит, яко врагов сущих, сам быв враг всякой истине, а товарищи его люди простыя и Божественнаго Писания неведующии (5). А диаки ведомыя враги Божия и дневныя разбойники, без всякия боязни в день людей Божиих губят, а что для того своего государева и земскаго великаго царственнаго дела указал государь, будто по совету со отцем своим святейшим Иосифом патриархом Московским и всеа Руси, и бояре приговорили выбрать из столников, и из стряпчих, и из дворян Московских, и из жилцов, из чину по два человека, так же всех городов, из дворян и детей боярских, опричь Новагорода, по два человека, а из Новагорода с пятины по человеку, а из менших городов по человеку, а из гостей трех человек, а из гостиныя и из суконныя сотен по два человека, а из черных сотен и из слобод из городов с посадов по человеку добрых и смышленых людей, чтобы его государево царственное и земское дело с теми со всеми выборными людми утвердити (6) и на мере поставить, чтобы те великия дела по нынешнему его государеву указу и Соборному уложению ничем нерушимы. И то всем ведомо, что збор был не по воли, боязни ради и междоусобия от всех черных людей, а не истинныя правды ради. А что, по государеву цареву и великаго князя Алексея Михайловича всея России указу, бояре князь Никита Иванович Одоевской с товарищи, будто выписав из правил святых Апостол и святых отец и из градских законов греческих царей, и из старых судебников прежних великих государей и государю приносили, и то он, враг Божий и всякой истины, все солгал: из правил святых Апостол и святых отец и благочестивых царей градских законов ничево не выписывал, якоже и самая та уложенная беззаконная книга свидетелствует беззаконие их. А где и написал, будто из правил святых Апостол и святых отец, таковых правил нет и во всей его книге и ни единаго апостолскаго правила, ниже святых отцев седми вселенских соборов и прочих нет, ни благочестивых греческих царей градских законов что любо, ниже от православных великих государей царей и великих князей руских, но все ново некое списание, чюжде православия и святых Апостол и святых отец церковных законов и православных царей греческих градских законов. Да и сам той свидетелствует в своем ложном списанни в десятой главе о суде.

Суд государя царя и великаго князя Алексея Михайловича всея Pocии судить бояром, и околничим, и думным людем, и дьяком, и всяким приказным людем, и судьям, и всякая росправа делать всем людем Московскаго государства от болшаго и до меншаго чину в правду, также и приезжих иноземцев и всяких прибылых людей, которые в Московском государстве будут, тем же судом судить и росправу делать по государеву указу в правду, а своих вымыслов в судных делех, по дружбе и по недружбе, ничего не прибавливати, ни убавливати и ни в чем другу не дружить, а недругу не мстить, и никому ни в чем, ни для чево, не норовить, делать всякие государевы дела, не стыдяся лица силных и избавляти обидящего от руки неправеднаго (7).

А спорные (8) дела, которых в приказех за чем вершить будет не мощно, взносить из приказов в доклад к государю царю и великому князю Алексею Михайловичу всеа Росии и к его государевым бояром и околничим и думным людем, а бояром и околничим и думным людем сидетъ в полате (9) и по государеву указу государевы всякие дела делать всем вместе.

Како же ты, списателю суда царска, а реку беззакония, суд глаголеши государя царя. Суд бо Божий есть и от исперва, а не царев: ни от человек, ни человеком предан бысть, но самем Богом (10). <…>

Тако ж и ины многи рабы посла святыя Апостолы и учители множайша первых, их же делатели не послушаша и сотвориша такожде, яко ж Предтечю Иоанна усекну Ирод, и Петра и Павла Нерон и инех инии. Что же сотвори дому Владыка? Не сей ли злых зле погуби и виноград предаст инем делателем, тако и по сих гречестии царие и инех царств мнози, елицы пожиша по Божественным заповедем и святыя преданныя правила святых Апостол и святых отец сохраняли, в мире скончалися и Царствию Небесному наследницы быша. А елицы беззаконно согрешиша, беззаконно и погибоша и царства их запустеша. Не сия ли вся збышася на нас по писанному: соберу на них злая и стрелы Моя скончаю в них. И по мале: не сия ли вся собрашася у Мене и запечатлешася в сокровищих Моих. В день отомщения воздам во время, внегда соблазнится нога их, яко близ день погибели их и предстоят готовая вам, яко поострю, яко молнию, мечь Мой, и приимет суд рука Моя, и воздам месть врагом и ненавидящим Мя воздам. Упою стрелы Моя от крове и мечь Мой снест мяса. Тогда увидите, яко Аз есмь Бог и несть, разве Мене. Не тако ли все, елико выше писанная, на нас сбышася? Не быша ли морове велицы во царствующем граде Москве (11) и во всех градех лютою язвою и неисцелною? Не возбоя ли ся сердце царево, егда мору бывшу, царице же на Москве со царевичем Алексеем и со царевнами, и не веде, что сотворити и камо бежати. Не бысть ли князя в пагубу, яко же князь Михаил Пронской с товарыщи в море на Mocкве умре, и от всенароднаго множества не ослабе ли всяка рука, яко ж князь Алексем Трубецким с товарыщи, два князь Семены Пожарский и Лвов и прочиe, и елико со инеми воеводы, с Васильем Шереметевым и князь Иваном Хованским. Коликия тмы скончашася мором по градом и по селом и по деревням и на войне? He убояше ли всяка душа человечя? Не смешаша ли ся послы, от царя посылаема до Москвы в мор и от Москвы до царя? Не прияша ли болезни, яко жена раждающая? Не поболеша ли друг о друзе? Не ужаснуша ли ся ужасом великим? Не быше ли лице их, яко пламы? Не быше ли день господень без целбы, полн ярости и гнева? Не положи ли Господь Москву и окрестныя грады пусты? Не погуби ли грешники от них? Не разшири ли ад души своея и не разверзе ли уст своих? Не снидоша ли славнии и велицыи, богатии и нищии, о них же множестве несть время зде исписать, их же число един Господь Бог весть. Не все ли се быша, по писанному, псом и свиниям на растерзание, птицам небесным и зверем земным на пожрение и расхищение. Кто тех оплака? Кто же ли погребе? Никто ж! Не се ли всех отдаде Господь в погибель всем царством земным, якоже от всех слышится оттамо приходящих, яко несть дому во странах поганских, в нем же не бе христиана неволника то есть полоненика. И сбышася вся на глаголющих, иже реша: да наследим ceбе святилище Божие. Боже мой, положи я, яко коло, яко трость пред лицем ветра, яко огнь, попаляяй дубравы, яко пламень, пожигаяй горы. Тако поженеши я бурею Твоею и гневом Твоим смятеши я. Исполни лица их безчестия и взыщут имени Твоего, Господи, да постыдятся и смятутся в век века, и посрамятся и погибнут, и да познают, яко имя Тебе Господь, Ты един вышний по всей земли. И паки во ином псалме: Бог отмщений, Господь, Бог отмщений не обинулся есть. Вознесися судяй земли. Воздаждь воздаяние гордым. Доколе, Господи, грешницы? Доколе грешницы восхвалятся, провещают и возглаголют неправду, возглаголют вси делающие беззаконие. Люди Твоя, Господи, смириша и достояние Твое озлобиша. Вдовицу и сира умориша и пришелца убиша и реша: не узрит Господь, ниже разумеет Бог Ияковль. Разумейте же, безумнии в людех и, буии, некогда умудритеся, яко не отринет Господь людей Своих и достояния Своего не оставит. Господь судит людем Своим и о рабех Своих умолится. И воста, яко спяй Господь, яко силен и шумен от вина, и порази враги Свои вспять, положениe вечное даде им. И смирися человек и обезчестися муж и очи высокоглядающии обнизитася. Обаче за мщения их положил еси им злая, низложил я еси, внегда разгордешася. Како быша в запустение внезапу, изчезоша и погибоша за беззаконие свое и во всех сих не отвратися ярость Его, но и еще рука Его высока. Тако и оставшим злотворящим Божественное Писание претит, глаголя: зане, его же Ты поразил еси, тии погнаша и к болезни язв моих приложиша, приложи беззаконие к беззаконию их, да не внидут в правду Твою, да потребятся от книг живущих и с праведными да не напишутся.

Ныне же к тебе обращаемся, лжи предтеча, списателю неправде и беззаконию, ты же ми отвещай. Пишешь в своем сложении, на листе 63-м: и по государеву цареву и великаго князя Алексея Михайловича всея Русии указу, бояре князь Никита Ивановичь Одоевской с товарыщи, выписал из правил святых Апостол и святых отец и из градских законов греческих царей, и из старых судебников прежних великих государей и прочее. И что из правил выписал, из которых правил? Се ли, еже пишешь в десятой главе, в первой статье, о суде: Суд государя царя и великаго князя Алексея Михайловича всея Русии судить бояром и околничим, и думным людем, и диаком, и всяким приказным людем и судьям, и всякая росправа делать всем людем Московскаго государства от болшаго и до меншаго чину в правду. Отвещай, в которых то правилах написано, что суд великаго государя царя, а не Божий. Мы же ти рехом, выше и ныне глаголем, яко суд Божий есть и о сем довольно преднаписахом. И царие слуги суть Божии, якоже Приточник глаголет: Слышите убо, цариe, и разумейте и научитеся судии концем земли. Внушите содержащии множества и гордящиися о народех язык, яко дана есть от Господа держава вам и сила от Вышняго, иже истяжет дела ваша и помышления испытает, яко слузи суще царства Его. И не судисте право, ни сохранисте закона, ниже по воли Божией ходисте. Тако и Давид глаголет: и ныне, цариe, работайте Господеви со страхом и прочее. А еже работати Господеви рабство знаменует. И сам о себе глаголет, яко аз раб Твой есмь, и инде глаголет: Твой есмь аз, спаси мя. Ты же како смел еси в своем ложном и проклятом писании, в десятой главе, в 25 статье: Да суда же не судить и никаких дел в приказех не делать, опричь великих царственных дел, в день Рожества Христова, в день Святаго Богоявления и в иныя Господьския праздники: Сырная неделя, Первая неделя великаго поста, Страстная неделя, седмь дней по Пасце. Да в которой день приспеет праздник день рождения государя царя и великаго князя Алексея Михайловича всеа Русии и его благоверныя царицы и великия княгини Марии Ильичны, и их благородных чад. О, пребеззаконниче и злобесный человече, како не устыдеся, ни устрашися. Беси того исповедаху Сына Божия и Бога, глаголаху: почто еси, сыне Божий, пришел еси, прежде времени, мучить нас. А ты, злострастный человече, не исповеда того Бога быть и Господа нашего Иисуса Христа, аки проста человека пишешь: в воскресной день, в день Рожества Христова, ибо христи мнози, и царие, и священницы христи, то есть помазанники, иже христи, яко же и Христос глаголет и Апостоли: мнози бо лжехристи изыдоша в мир и антихристи мнози, а Христос Бог наш един есть. Не усохл бы скверный твой язык изглаголати или написати: Рожество Года Бога и Спаса нашего Иисуса Христа или Святое Богоявление Господа Бога и Спаса нашего Иисуса Христа, и ниже праздник нарече, но день. А яже о царе, да в который день приспеет праздник, день рождения государя царя и прочее, такожде и о царице, и о их чадех. Которыя праздники? Которое таинство, разве что любострастно и человеческо? И во всем приподобил еси человеков Богу, но и предпочтеннее Бога. <...>

Послушай, лжи списателю, како ни сын, развее отца, не делает, якоже сам Господь свидетелствует: Отец Мой доселе делает и Аз делаю. Сего же ради паче имаху Его иудее убити, яко не токмо разоряше суботу, но и отца своего глаголаше Бога, равен ся творя Богу. Отвещав же, Иисус рече им: аминь, аминь глаголю вам, не может Сын творити о себе ничесоже. А ты, беззакониче, почто смел о себе творити. Таже рече: аще не еже видит Отца творяща, яже бо Он творит, сия и Сын такожде творит. Отец бо любит Сына и вся показует Ему, яже Сам творит, и болша сих покажет Ему дела, да вы чюдитеся. А ты, богоборче, от кого видев, навык делати беззаконие свое. Господу глаголющу: яко бо Отец воскрешает мертвых и живит. А ты, беззаконнодавче, имаши власть воскрешати и живити. Господу глаголющу: Отец бо не судит никому же, но суд даст весь Сынови; да вси чтут Сына, яко же чтут Отца. Иже не чтет Сына, не чтет Отца, пославшаго Его. А тебе, злохитре, кто даде суд писати и нарицати суд государя царя. Господу Богу глаголющу: аминь, аминь глаголю вам, яко слушаяй словесе Моего и веруяй пославшему Мя, имать живот вечный и на суд не приидет, но преидет от смерти в живот. А ты почто не слушаеши словесе Божия и не веруеши пославшему Его, и живота вечнаго не хощеши имети, и на суд хощеши приити от живота вечнаго в вечную смерть. Господу глаголющу: яко же бо Отец имать живот в себе, тако даст и Сынови живот имети в себе. Но власть даст Ему и суд творити, яко Сын человеч есть, не дивитеся сему. Ты убо откуду имаши живот в себе и кто ти даст область сию и суд творити? Господу глаголющу: яко грядет час, в он же вси сущии во гробех услышат глас Сына Божия и изыдут сотворшии благая в воскрешение суду. Ты имаши ли власть такову, дабы кто услышал глас твой, имел живот вечный и на суд не пришел, аще ли же не имаши, почто сам не содрогаешися от суда Божия, беззаконно судя патриарха и митрополитов, и архиепископов, и епископов, и прочих священнаго чина, якож пишешь в 10 главе, в 30 статье (12). Господу глаголющу: не могу Аз о себе творити ничесоже. Якоже слышу, сужду, и суд Мой праведен есть. Яко не ищу волю Мою, но волю пославшаго Мя Отца. Ты же непокориве, како смел о себе сотворити суд и от кого ты слышал о суде, судишь, и кто знает, яко суд твой праведен есть, и не по своей воли написал, но по воли Божией, и где есть такова воля Божия, покажи нам. Господу глаголющу: аще Аз свидетельствую о Мне, свидетелство Мое несть истинно, ин есть свидетельствуя о Мне и вем, яко истинно свидетелство, еже свидетелствует о Мне. Твое же кто весть свидетелство, яко истинно есть предание и суд?

Разсмотри, богоборче и истинноборче, повсюду писание со свидетелствы писаное, а не без свидетелства, яко же ты самоумне нанисал Уложенную книгу безо всякаго свидетелства (13). <…>

Ныне же един точию ты предал закон несогласен ветхому и новому закону и всему Божественному Писанию. Господу убо глаголющу: не мните, яко приидох разорити закона или пророк, не приидох разорити, но исполните. Ты же, богоборче, не закон и пророки, но и самое святое священное Евангелие и вся святыя законы не устыдеся разорити. Господу свидетелствующу и глаголющу: небо и земля прейдет, от закона же иота едина или едина черта не прейдет. Ты же вся единою премину и ниже устрашися Божия страха. Иже аще разорит едину, рече, заповедий сих малых и научит тако человеки, мний наречется в царствии небеснем то есть не наречется. Ты же сам вся святыя заповеди разорив, и всем людем в закон свое беззаконие написа. Не глаголет убо Христос законныя заповеди малы, но их же он предати хощет, нарицает же их малы, смирения ради, да и тебе научит смиреномудрствовати; мал же наречется, иже сам не творит, но заповедем и других тако учит, сам дело не имея. Мал же наречется во Царствии Небеснем, сиреч на воскресение последний и, отвержен в геену огненну, не внидет бо тако в Царство Небесное, других уча, сам же заповеди презирая и попирая и ни во что же вменяя, како бо иного кто наставити может на путь, им же сам не ходил есть. Ты же, богоборче, отметая заповеди Божия и не пребывая во учении Христове, како имаши внити в Царство Небесное.

Не слышал еси Господа глаголюща: но народ, иже не весть закона, прокляти суть. И святый Давид глаголет: прокляти уклоняющиися от заповедей Твоих. И святый Иоанн Богослов глаголет: всяк преступаяй и не пребываяй во учении Христове, Бога не имать.

В Уложенной книге твоего списания глава 1, статия 1, о богохулниках: будет иноверцы какия ни буди веры или русский человек возложит хулу на Господа Бога и Спаса нашего Иисуса Христа или на рождьшую Его Пречистую Владычицу нашу Богородицу и Приснодеву Марию или на Честный Крест или на святых его угодников, и про то сыскивати всякими сыски накрепко, да будет сыщется про то до пряма, и того богохулника обличив, казнити, зжечь. И что болше тоя хулы? Еже отложите вся заповеди Христовы: и святых Апостол и святых отец заповеди и каноны, лгати на Господа и на святых его, о них же напреди скажем, да тое же Уложенной книги во 2 главе, в 1 статье, написано: будет кто каким злым умышлением учнет мыслити на государское здоровье злое дело, и про то его злое умышление кто известит и, по тому извету, про то его злое умышление сыщется до пряма, что он на царское величество злое дело мыслил и делать хотел, и такова по сыску казнити смертию.

Глава 1, статия 2: также будет кто при державе царскаго величества, хотя Московским государством завладеть и государем бытии, и для того своего злаго умышления начнет рать збирать или кто царскаго величества с недруги учнет дружитися и советными грамотами ссылатися, и помочь им всячески чинить, чтобы тем государевым недругом, по его ссылки, Московским государством завладеть или какое дурно учинить, и про то на него кто известит и, по тому извету, сыщется про тое его измену до пряма, и таковаго изменника потому же казнити смерию.