"Мнение Патриарха Никона о Соборном Уложении..."

Предисловие, подготовка текста и комментарии Г.В. Талиной

Да в той же книге, во 2 главе., в 20 статье: также самоволством, скопом и заговором к царскому величеству и на его государевых бояр и околничих, и на думных, и на ближних людей, и в городех и в полках на воевод и на приказных людей, и ни на кого никому не приходити, и никого не грабити и не побивати. 21 статья: а кто учнет к царскому величеству или на его государевых бояр и околничих, и думных, и ближних людей, в городех и в полкех на воевод и на приказных людей, или на кого ни буди, приходити скопом и заговором, и учнут кого грабити или побивати, и тех людей, кто так учинит, за то потому же казнити смертию безо всякия пощады. И аще кто начнет мыслить на царское величество злое умышление или похочет Московским государством завладеть и государем бытии, или кто учнет к царскому величеству или на его государевых бояр и околничих, и думных, и ближних людей, и в городех и в полкех на воевод и на приказных людей или на кого нибуди приходити скопом и заговором, и учнут кого грабити или побивати, и тех людей казнити смертию безо всякия пощады. Да ты же пишешь в 4 главе, в 1 статье: будет кто грамоту от государя напишет сам себе воровски или в подлинной государеве грамоте и в иных каких приказных писмах что превратит своим вымыслом, мимо государева указу и боярского приговору или думных и приказных людей, и подьяческия руки подпишет или сделает у себя печать такову, какова государева печать, и такова за такия вины казнити смертию. 2-я статья: а будет воровством же учнет отымати государевы печати от государевых грамот или от иных каких приказных писем и те государевы печати учнет к иным каким воровским писмам прикладывать или будет кто учнет какия писма воровством же наряжати и приказныя писма переправливати, мимо государева указа, и того казнити смертию, а писмам его нарядным ни в чем не верити. 3-я статья: а будет кто, такия писма зделав, умрет, а после его те писма объявятся у племяни или у прикащиков, и то его племя и прикащики учнутъ по тем писмам о каком деле государю бити челом, и про них сыскати, каким обычаем те им писма достались, и где их взяли, и про то они ведали ли, что те писма нарядны; да будет про них в сыску скажут или они сами в том повинятся, что они про то ведали, что те писма воровские, нарядные, а держали они их у себя для своих пожитков и корысти и тех людей потому ж казнити смертию. Послушай, неправедный человече, что Господь к таковым лицемерам глаголет: рабе лукавый, от уст твоих сужду тя. Тако и зде не погрешить истины, кто тебе изглаголет такожде. И аще царския грамоты и уставы и приказныя писма переправит кто своим вымыслом, мимо государева указу и боярского приговору или думных и приказных людей подьяческия руки подпишет, или будет кто учнет какия писма воровством нарежать и приказныя писма переправливати мимо государева указу, или после кого останутся такиe воровския писма, или кто печать зделает, и за то казнити смертию. А иже на самого Бога вознеистовствася и преобидит Божию власть, яко же и денница и Божие достояние, и Божий суд, преписав на царское имя: суд государя царя и прочее, и святых Апостол и святых отец, и учителей и законоположников наших, приимших власть от несочетаннаго Царя и Бога нашего, Господа Иисуса Христа, на земли и на небеси имущих власть вязати и решити и не человеком точию хотящим судити, но и Ангелом, то тех обезчестит, и власть и честь и заповеди разорив и ни во что положив, коликих мук той и смерти достоин. Господу свидетелствующу: иже есть от Бога, глаголы Божия послушает. Сего ради вы не послушасте, яко от Бога несте. И инде рече: слушаяй вас, Мене слушает и отметаяйся вас, Мене отметается. Да ты же пишешь в 18 главе, во 141 статье: будет кто учинится приставу силен, и по доездной памяти, по того ослушника послати в другие иного пристава, а к воеводе в тот город, где тот ослушник живет, послати государева грамота, чтобы воевода на того ослушника приставу дал стрелцов и пушкарей и затинщиков, сколко человек пригож, чтобы было пристава, с кем такова ослушника изымать, да как пристав того ослушника, изымав, к Москве приведет и тому ослушнику за его ослушание учинити наказание, бить батоги да на нем же доправить исцу проесть и волокита по узазу и неделщиком езд без суда и отдати исцу, а будет кто в третие также сотворит и ему тоже наказание учинить и вкинуть в тюрму на месяц. А во 142 статье: будет кто у пристава наказную и приставную память или государевы грамоты отымет и издерет и такова непослушника за государеву грамоту бить кнутом и посадить в тюрму на три месяцы, а кто неделщика или понятых побиет до смерти, и того убойцу самого казнити смертию же. И аще тако царевым непослушником и судьиным без казни не прощено, а иже Божии и святых его Апостол и законоположник заповеди преступая и попирая, колики муки ждут. Божие Слово, и не погрешает: им же бо судом судите, осудитеся и ею же мерою мерите, возмерится и приложится. Господу глаголющу: глаголю бо вам, яко аще не избудет правда ваша паче книжник и фарисей, не внидете в Царство Небесное. Толкование: правду глаголет всяку добродетель, яко же речено: праведен бяше, Иов, преподобен, непорочен. Устрашися прочее, о человече, разумев, колико должни есмы. Таже учит нас, како изобилна правда наша будет паче фарисей и книжник. Прочее же устрояет, добродетели, глаголя (Евангелие): слышасте, яко речено бысть древним: не убиеши, иже бо аще убиет повинен есть суду, Аз же глаголю вам, яко всяк, гневаяйся на брата своего всуе, повинен есть суду.

Како же ты, богоотступниче и евангелских заповедей разорителю, ин закон вводишь в проклятом твоем списании в 10 главе, в 27 статье: будет боярин или околничий или думный человек обесчестит словом патриарха, и за патриаршее безчестие боярина, и околничего, и думного человека по сыску отослати к патриарху головою. Статья 28: а будет боярин, и околничий, или думной человек обезчестит словом митрополита или архиепископа и епископа, и за митрополиче, и apxиепископле, и епископле безчестье, боярину, и околничему, и думному человеку митрополиту за безчестье четыреста рублев, apхиепископу триста рублев, епископу двести рублев, а будет кому платить нечем, и его за властелинское безчестье отослать ко власти головою, будет сыщется до пряма. Статья 29: а будет боярин или околничий, или думной человек обезчестит архимандрита или игумена, или иной какой иноческий чин, и им за безчестье по суду или по сыску платить безчестье против государева указу. Статья 30: а будет патрирха или митрополита, или архиепископа, или епископа, или архимандрита, или игумена, или келаря, или казначея, или иной иноческой чин обезчестит словом столник или стряпчей, или дворянин Московской, или гость, или дьяк, или жилец, или дворянин, или сын боярской городовой, или иноземец, или дворовой человек, а по сыску и по суду сыщется про то до пряма, и им за такое безчестие чинить указ — за патриарха бить батоги, за митрополита посадить в тюрму, за архиепископа и епископа в тюрму же посадить. Статья 31-я: а будет патриарха или митрополита, или архиепископа, или епископа, или архимандрита, или игумена, или келаря, или казначея, или иной иноческой чин обезчестит словом гостиной и суконной сотни или черных сотен и слобод тяглой человек, или стрелец, или казак, или пушкарь, или кто иной, какова чину ни будь, а по суду или по сыску про то сыщется до пряма, и им за то чинить указ — за патриарха учинить торговая казнь да посадить в тюрму на месяц, за митрополита бити батоги да в тюрму посадить на четыре дни, за архиепископа и епископа бить батоги да в тюрму на три дни, а архимандритам, и игуменом, и архидиакону, и Троицы Сергиева и всех монастырей келарем, и казначеем, и соборным старцам, и рядовой братие править за безчестье: Живоначалныя Троицы Cepгиeвa монастыря архимандриту 100 рублев, и прочее же о прочих монастырех писанное. Откуду ты, беззакониче и злобе списателю, такова навык чрез Божественныя Христовы заповеди и святых Апостол и святых отец заповеди и каноны возмеряти противу зла зло: ранами и сребреными искупы, качествы и количествы. Не слыша ли твое нерадивое ухо законоположника нашего и учителя Господа и Бога и Спаса нашего Иисуса Христа, учаща и глаголюща вышереченное и любо вам, яко аще не избудет правда ваша паче книжник и фарисей, не внидите в Царство Небесное. Да которая правда в проклятом твоем списании, а аще кто патриapxa обезчестит, и по суду и по сыску оваго головою отослать судил еси, оваго бить кнутом, иного бить батоги, иного в тюрму, на ином безчестие править, яко же выше сего твое безумное и проклятое беззаконие изобразися. А в 83 (14) статье пишешь: а будет митрополит, или архиепископ, или епископ, или архимарит, или игумен и прочие обезчестит словом бояр, и околничих, и прочих, а сыщется про то до пряма, и им по сыску тем людем, кого они обезчестят, платить за безчестье против их окладов, что кому государева денежнаго жалованья, а гостем и иных чинов людям по указным стятьям. Статья 84-я: а будет которому архимариту, или игумену, или келарю, или казначею, или рядовым старцам за чье безчестие платить будет нечим, и на них тем людям править безчестье нещадно до тех мест, как они с исцы учинят зделку. Горе тебе и списанию твоему, неправедниче, имать Бог бити, стено поваплена, по святому Апостолу Павлу, яко суд укривлен всюду сотворил еси. И пишешь в 91-й статье: а будет боярина, или околничего, или думнаго человека обезчестит столник, или стряпчей, или дворянин московской, или гость, или дьяк, или жилец, или дворянин, или сын боярской городовой, или иноземец, или дворовой человек, и на них боярам, и околничим, и думным людям по суду и по сыску править безчестие же, а будет кому из тех чинов боярину, или околничему, или думному человеку за безчестье платить будет нечим, и их бить кнутом. Статья 92-я: а будет бояр, и околничих, и думных людей обезчестит кто словом гостиные, и суконныя, и черных сотен и слобод тяглой человек или стрелец, или казак, или пушкарь, или монастырской слуга, или иных чинов люди, кто ни будь, или холоп боярской, а по суду и по сыску сыщется про то до пряма, и их за боярское, и околничих, и думных людей безчестие бити кнутом да их же сажати в тюрму на две недели. Не послушал еси писаннаго: не познай силна и убога на суде, яко суд Божий есть. Себе и подобных себе мест всем несравнену положил. За патриаpxa бить батоги, а за митрополитов, и архиепископов, и епископов сажать в тюрму, а себе сугубо бить кнутом да на две недели в тюрму. Не слышал еси Спаса глаголюща: осудитеся и ею же мерою мерите, возмерится, и Божественный Апостол глаголет: безумне, ты избежиши ли суда Божия, во истинну на творящих таковая суд Божий есть. Коликим мукам еси и томлению повинен за таковое безбожное предание и беззаконный занон, елико по нему сотворили бедным осужеником раны и иная злая, ты всем повинен. Збысться во псалмех писанное: рече безумен в сердцы своем — несть Бога. Растлеша и омразишася в беззакониих, несть творяй благостыня, несть до единаго. Бог с небесе приниче на сыны человеческия видети, аще есть разумеваяй или взыскаяй Бora, вси уклонишася вкупе и непотребни быша. Несть творяй благое, несть до единаго, ни ли разумеют вси делающии беззаконие, снедающии люди Моя в хлеба место. И паки другое писание: провещают и возглаголют неправду, возглаголют вси делающии беззаконие, люди Твоя, Господи, смириша и достояние Твое озлобиша, вдовицу и сира умориша и пришелца и реша: не узрит Господь, ниже разумеет Бог Ияковль. Разумейте же, безумние в людех и буии некогда умудридитеся; насаждей ухо, не слышит ли или создавый око, не смотряет ли, наказуяй языки не обличит ли, учай человека разуму, Господь весть помышления человеческа, яко суть суетна. <…>

Послушай, праведный беззакония списателю, Божественнаго учения, еже Господь глаголет: Аз же глаголю вам, яко всяк гневаяйся на брата своего всуе, повинен есть суду. Которому суду? не твоему беззаконному, но суду Божию, нелицемерному, неуместному, яко же учит нас святое священное Евангелие. Егда же приидет сын человеческий во славе своей и вси святии Ангели с ним, тогда сядет на престоле славы своея и соберутся пред ним вси языцы и проч. А не твоему суду повинни, еже ты написал: аще кто обезчестит словом патриарха и митрополита, или apхиепископа, или епископа, или архимарита, или игумена и проч. того чина столник или стряпчий и прочии того чина, или гостиной и суконной сотни, даже до стрелца, и казака, и пушкаря, и прочаго всякаго человека, а по суду и по сыску указ учинить по государеву указу. А кому кого судить, не определил еси! Кому патриарха, кому ли митрополита, и архиепископа, и епископа, и архимарита, и игумена, и прочих, якоже и в 13 главе, в 1 статье, написал еси: на митрополитов, и на архиепископов, и епископов, и на их приказных, и на дворовых людей, и на детей боярских, и на их крестьян, и на монастыри: на архимандритов, и игуменов, и на строителей, и на келарей, и на казначеев, и на рядовую братью, и на монастырских слуг, и на крестьян, и на попов, и на церковный причет во всяких исцовых искех суд давать в Монастырском приказе. А по которым правилам и кому судить, того не написано же. А в 10 главе, в 1 статье, написано: суд государя царя и великаго князя Алексея Михайловича всея Русии судить бояром, и околничим, и думным людям, и дьякам, и всяким приказным людям, и судьям и всякая расправа делать всем людем Московскаго государства от болшаго и до меншаго чину в правду. <…> (15)

Покажи нам, гдe есть во апостолских и святых отец и благочестивых царей греческих градских законах и в старых судебниках прежних великих государей: судити бояром, и околничим, и думным людям, и дьякам, и всяким приказным людям и судьям патриарха, и митрополитов, и архиепископов, и епископов, архимаритов, и игуменов, и весь духовный чин? Покажи ми во своем ложном списании и не отрекися. И аз ти покажу Господа Бога и Спаса нашего Иисуса Христа суд и месть. Тако глаголет Господь: а иже бо аще речет брату своему рака, повинен есть сонмищу. Толкование. Собор убо не царское или боярское и прочих мирских судей, но архиерейской суд глаголет, якоже правила и царския и великих князей, таковыя безчестныя суды, кто кого обезчестит словом, судить архиереом. О них же многащи писано есть выше сего. Нам же, архиереом и прочим священнаго чина доволно есть на отомщение лаятелем нашим Божественное отмщение… Богу свидетелствующу: отраднее быти Содому и Гомору, нежели тебе, слышавшему слово Бoжия и не хранящему. И якоже пишешь в 12 главе о суде патриарших приказных, и дворовых всяких людей, и крестьян, статья 1: на патриарших, и на дворовых людей, и на детей боярских, и на крестьян, и на всяких чинов людей, которые живут в патриарших домовых вотчинах, во всяких делех суд давать безсрочно на патриарше дворе, потому что при прежних государех и блаженныя памяти при великом государе царе и великом князе Михаиле Федоровиче всея Pycии ни в которых приказех на них суда не давали, а судили их на патриарше дворе, что судные дела слушает и указывает патриарх. Смотри, злых предателю, како зде и сам свидетелствуеши, что при прежних государех и блаженныя памяти при великом государе царе и великом князе Михаиле Федоровиче всея Русии на патриариших приказных, и на дворовых людей, и на детей боярских, и на крестьян, и на всяких чинов людей, которые живут в патриарших домовых вотчинах, во всяких делех суд давали на патриарше дворе. А ты и самаго патриарха в суд мирской низвел, как пишешь в 10 главе, в 30 и в 31 статье: будет кто обезчестит патриарха всякого чину люди даже до стрелцов и мужиков, а по суду и по сыску чинить указ коемуждо. А во 12 главе в 3 статье пишешь: а которые патриарши приказные и дворовые люди, и дети боярские, и патриарши крестьяне учнут в которых приказех на каких людех всяких дел искати, а ответчики на них в тех же приказех, не сходя с суда, учнут встречно искать, и на них суд давать в тех же приказех. И коли уже в том же приказе приказных патриарших и всяких чинов людей, где они сами искати станут, то уже и сам патриарх в котором приказе о своем безчестье станет бити челом на ково, и тем противно в том же приказе волно и на патриарха бити челом, в какове деле похотят, и указ тот же патриарху со стрелцом и с мужиком. Такожде и митрополитом, и архиепископом, и епископом, и прочаго церковнаго причету, как пишешь в 13 главе, в 1 статьи: на митрополитов, и архиепископов, и епископов, и прочее суд давать в Монастырском приказе.

Статья 2-я: А которые митрополичьи, и архиепископли, и епископли приказные и дворовые люди, и дети боярские, и крестьяне, так же и розных монастырей архимариты, и игумены, и строители, и келари, и казначеи, и соборные и рядовые старцы, и монастырские слуги, и крестьяне учнут в котором приказе искати всяких чинов на людех, а ответчики после его ответу учнут по челобитным на тех лицах искать своих исковых дел, и тем ответчиком на митрополитов, и на епископов, и на архимаритов, и на игуменов, и на строителей, и на келарей, и на казначеев, и на соборных и на рядовых старцов, и на митрополичих, и на архиепископлих, и на епископлих приказных и на дворовых людей, и на детей боярских, и на монастырских слуг и на крестьян по их исковым челобитным суд давать в тех же приказех против их ответчиковых челобитен. Да якоже в 10 главе, в 1 статье, написал еси: суд один от мала и до велика, не описуя чину и достояния, то уже и казни неотменны, как простым людям, так и священнаго чину: патриарху, митрополиту, и архиепископу, и епископу, и архимандриту, и игумену, и священнику, и диакону, и всем прочим причетником. Написано в 10 главе, во 106 статье: а будет кто нибудь, пришед в которой приказ к суду или для иного какова дела, судью обезчестит неприличным словом, а сыщется про то до пряма, и того за государеву пеню бити кнутом, а судье велеть на нем доправити безчестие. И во 142 статье 10-е-же главы: будет кто наказную или приставную память или государевы грамоты отъимет и издерет, и тем он приказных людей, от которых тот пристав послан будет, обезчестит, а сыщется про то до пряма, и такова непослушника за государеву грамоту бити кнутом и посадити в тюрму на три месяцы. И аще бы принужен кто был священнаго чину — патриарх, и митрополит, или архиепископ, или епископ, или архимандрит, или игумен, или священник, или дьякон, даже до последних причетник, по твоим беззаконным законом в судище, не точию послушал бы, но поплевал и про судью беззаконного и закон, яко же отроцы, по повелению цареву, не точию понудишася, но и оплеваху. Такое же и прочии святые мученицы и споведницы, о них же слышим, по вселетном воспоминании, в книге Прологе: како храборски потщася, влекоми на судища, не точию повинушася, но и оплеваша и прокляша беззаконие их. Тако и ныне, аще кто за святый евангелский закон и за заповеди Христовы, и святых Апостол и святых отец каноны станет и мужески подвигнется, якоже и первии подвижницы, не точию судьи послушает, но и оплюет и проклянет веление его и закон. Такожде и у пристава наказную и приставную память аще кто отъимет, и издерет, и оплюет, и потопчет, не погрешит таковый своего спасения, якоже и первомученицы. По чесому же ли се разумно будет, свидетель сему первый подвигоположник, самая истина, Христос, глаголяй: Евангелиe: Се аз посылаю вас, яко овцы посреди волков, будете же мудри, яко змия, и цели, яко голубие. Толкование. Хощет Господь всем верующим в него мудрым быти; даже не слышат, яко овцам быти им, и возмниши, яко несмысленну подобает бывати христианину. Глаголет же, яко и мудру подобает быти и яко ведети, како подобает пребывати посреди многих враг, якоже бо змий все тело свое прочедает на биение, главу же токмо соблюдает, тако и христианин вся имения дает тело свое поражающим, главу же, еже есть Христос и вера, яже к нему, и закон и заповеди, сохранена да будет даже до смерти. Евангелие: Блюдите же ся вы сами, внемлите же от человек, прежде же всех сих возложат на вы руки своя и изжденут, предающе на сонмища и темница, и на соборищах биени будете, пред воеводы и владыки и цари, ведени будете Мене ради во свидетелство им и языком, предани же будете с родители и братиею и родом и други, и умертвят от вас и будете ненавидими от всех имене Моего ради, и влас главы вашея не погибнет, в терпении вашем стяжите душа ваша. И паки инде: блаженни изгнанни правды ради, яко тех есть Царство Небесное. Блаженни есте, егда поносят вам, изжденут вы и рекут всяк зол глагол, на вы лжуще имени Моего ради. Толкование. Не иже бо токмо уничижаем, блажен, но егда Христа ради и изгонится. Аще ли си две не суть, окоянен он ест, а не блажен, яко многих соблажняя. Понеже и злодее и разорители закона евангелскаго и заповедей, оглаголуеми и обличаеми от любящих и хранящих евангелское слово, мнят тяжко себе и поносно быти, и того ради умыслиша, якоже ты, князь Никита, новой закон написал, советом антихриста, учителя твоего, в 10 главе, в 83 статье: а будет митрополит, или архиепископ, или епископ, или архимарит, и прочее священнаго чину обезчестит словом бояр, и околничих, и прочих, а сыщется про то до пряма, и им по сыску тем людям, кого они обезчестят, платить за безчестье против их окладов. Статья 84: а будет которому архимариту или игумену и прочих за чье безчестие платить будет нечим, и на них тем людям править безчестье нещадно до тех мест, как они с исцы учинят зделку или как в том исцом своим добьют челом. Не суть ли дъяволской сей закон? Ей, самого антихриста, дабы никто не смел тяжести ради уложенныя никому о правде Слова Божия проповедати, по писанному: не обличай безумных, да не возненавидят тя. Обличение бо нечестивому мозолие ему есть. Мозоль бо аще и не велми велика есть, но болезнена. Тако и не приемлющим Слова Божия, тяжко им мнится, аще кто возглаголет о правде Божии, безчестие себе быти мнят и поношение, того ради и Господь ко учителем слова рече: аще согрешит к тебе брат твой, иди, обличи его; аще ли послушает тебе, прибрел еси брата своего; аще ли не послушает, пойми с собою единаго или двух, да при двою или треми станет всяк глагол, то есть, дабы не приложили на оглаголющаго ложна слова, еже есть не мнили безчестие якож выше речеся. И аще по сих, рече, не послушает, повежд церкви, то есть (16) архипастырю церкви патриаху, или митрополиту, или архиепископу, или епископу и подобных от сих, и он накажет его повиноватися Божественными евангелскими заповедми, и аще такова презорника укорит и наречет его богоотступником и антихристовым предтечею, врагом Божиим и гореe иноязычника, мытаря, и повинника мукам вечным, паче содомлян и гоморян и грешнейши, на них же паде столп Силоямский и поби их и аще не покаются, такожде погибнут, якоже и они, и горе им проповедати паче Вифсаиды и Хоразина, не послушающим слова Божия. Понеже зде не устыдеся Господа Бога и его словес, имать постыдетися пред Ангелы Божиими. Тако Господу засвидетелствующу и якоже и Павел, Елиму волхву противящемуся, хотящаго Анфипата развратити от веры. Савл же, иже и Павел, иснолнися духа, возреве нан, рече: о, исполнене всякоя злобы, сыне дияволов, враже всякая правды, не пристаеши ли, развращая пути Господня правыя. От таковых убо по Божественной заповеди из града или из дому исходити и прах ног своих отрясти во свидетелство им. <...>