"Мнение Патриарха Никона о Соборном Уложении..."

Предисловие, подготовка текста и комментарии Г.В. Талиной

Ты же како сам о себе явился мудр, еже не веруеши Евангелию Христову, и святым его ученикам и Апостолам, всем верховным, со инеми семиюдесяти, с ними же и святых отец седми вселенских собор 1999, со девятию святых отец поместных соборов, их же число Бог весть, их же ты учения тех отречеся, и не просто отречеся, но и оболга. Таже по сих не остави и царей и патриархов оклеветати и оболгати, и написа в 16 главе, в 1-й статье, "О вотчинах": в прошлом во 136 году (17), блаженныя памяти великий государь царь и великий князь Михаиле Феодорович всеа Росии и отец его государев блаженныя памяти великий государь святейший Филарет Никитич, патриарх Московский и всея Росии, указали о родовых и о выслуженых вотчинах по правилам святых Апостолов и святых отец, кого не станет, а после его останется жена бездетна и прочее. И того в правилех святых Апостолов и святых отец нигде не обретается, то все на правила святых Апостол и святых отец, и на царя, и на патриарха солгано. Правил таких святых Апостол и святых отец не обретается. И великим государем таким, царем и патриархом, не по истине и не согласно с правилы святых Апостол и святых отец законы уставляти неподобно. Такожде и в 4 статье тоеже главы пишешь: а родовым и выслуженным вотчинам государь указал, и бояре приговорили, быти по правилам святых Апостол и святых отец, и по уложению прежних государей и отца своего государева блаженныя памяти великаго государя, царя и великаго князя Михаила Феодоровича всея России, и деда своего государева блаженныя памяти великаго государя святейшаго Филарета Никитича патриарха Московскаго и всея Русии 136 и 137 году (18), как писано выше сего. И cиe потому же на царя и на бояр солгано, что будто по правилам святых Апостол и святых отец, и таковых правил не обретается нигде ни во градцких законех. Ты же пишешь в 19 главе, в 1 статье, о посадских людех: которые слободы на Москве патриши, и митрополичи, и владычни, и монастырские, а в тех слободах живут торговые и ремесленные люди, и всякими торговыми промыслы промышляют и лавками владеют, а государевых податей не платят и служеб не стужат, а те все слободы со всеми людми, которые в тех слободах живут, все взяты за государя в тягло и в службы безповоротно, а впредь, опричь государевых слобод, ничьим слободам на Москве и в городех не быть, а у патриарха слободы взяти совсем, опричь тех дворовых людей, которые изстари за прежними патриархи живали (19). Статья 5: а которые слободы патриарши, и властелинские, и монастырские около Москвы, и те слободы со всякими промышленными людми, оприч кабалных людей, по тому же по сыску, взять за государя. Почто, оставя Господа, на рабов наскакаеши? Патриарх и сам Божий раб и служитель святые церкви и ничтоже имеет своих вотчин, но что есть слободы и крестьяня, Божие наследие. Патриарх ныне сей, а по нем ин, Бог же присно и есть и будет, и не изменяется в век, и достояние его пребудет в век.

Аще ли хощеши навыкнути о Божии наследии, еже к нужнейшей потребе, умышлено от боголюбцов Господу Богу во Святей Троице, Пресвятей Богородицы, и святым Ангелом, и святому пророку и Предтечи Иоанну, и святым славным и всехвалным Апостолом, и святым Пророком, и мучеником, и святителем, и преподобным отцем, и всем святым давали великие государи цари и великие князи и прочие боголюбцы ко святым Божиим церквам по Божественной заповеди, в вечный поминок, а не патриapxy, и митрополитом, и владыкам, и монастырем, якоже свидетелствуют тех боголюбцов данныя грамоты и духовныя их уставы. А по правде устав той от самаго Господа Бога предадеся тако, яко же есть писано древле, и рече Господь к Моисею, глаголя: пойми племя Левино и постави я пред Аароном жрецем и да служат ему и да стрегут стражбы его и стражбы сынов Иизраелевых, пред храмом свидения служити службу храмную и да снабдят вся сосуды храма свидения и стражбы сынов Иизраелевых по всем делам храма, и да даси Левиты Аарону, брату твоему, и сыном его, жрецем дани; дани бо суть ему сии от сынов Иизраилев. Аарона же и сыны его пристави в храме свидения и да снабдят жречество их и все, еже у олтаря и внутреняя завесы. Иноплеменник же, прикасаяйся, да умрет. И рече Господь к Моисею, глаголя: се Аз взях Левиты от среды сынов Иизраелевых вместо всего первенца, отверзающаго утробу от сынов Иизраилевых, да будет мне Левиты, Мне бо всяк первенец в он же день побих всяк первенец в земли Египетстей и освятих себе всяк первенец во Иизраили от человека до скота, Мне да будут. Аз Господь. — И да приведеши пред храм свидения и да собереши весь сонм сынов Иизраилев и приведеши Левиты пред Господь, и да отлучит Аарон Левиты отдание пред Господь от сынов Иизраилев и да служат службу Господеви, Левиты же да возложат руки на главы телцем и да сотвориши един гpеxa ради, а вторый во всесозжение Господу очистити о них, поставиши же Левиты пред Аароном и пред сынми его и да отда сия отдание Господу, и да отлучиши Левиты от среды сынов Иизраилев и да будут мне, по сем же да внидут Левиты служити службу в храме свидения. <…>

Разсмотри, богоборче, князю Никито, како глаголеши, яко слободы патриарши, и митропольи, и владычни, и монастырския, не все ли суть Божии и мы его есмь, развее и тебе и подобных тебе. Не Его вы есте! Не все ли из начала бысть, по Божию велению и заповеди. Священническая часть — Божия часть и достояние. Почто, преминув болшаго, еже есть Бога, к меншим низходиши, то есть к нам смиренным и называеши Божию часть и достояние. Наше достояние не суть ли наше достояние, Божие есть достояние, и якоже древле, по Божественной заповеди, одесятствоваша людие, тако и в новом законе давали благочестивыя цари, яко же Константин Великий, иже есть писано выше сего в заповеди его, такожде и на Pycии великий князь Владимир, крестивый русскую землю, и подобные тем давали во святыя Божия церкви Пресвятей и Живоначалней Троице, и Господу Богу и Спасу нашему Исусу Христу, и Пресвятей, Пречистей, Преблагословенней Влыдычице нашей Богородицы и присно Деве Марии, и святым Ангелом и Архангелом, и святому Иоанну Пророку и Предтечи, и святым всехвалным верховным Апостолом, и святым великомучеником, и святым верховным учителем и святителем, и преподобным и богоносным отцем, и всем святым, а не патриарху, и митрополитам, и владыкам, и монастырем, яко же свидетелствуют писанныя заповеди великаго царя Константина, и великаго князя Владимира, и прочих боголюбцев и христолюбцев жалованныя грамоты и вкладныя. Ов убо дал Пресвятей и Живоначалней Троицы, ин же святому Спасу Христу человеколюбцу, ин же Пресвятей Богородицы и прочее, яко же выше сего писано. И быша таковыя слободы в послужение святым Божиим церквам вместо левит, яко же выше сего писано, яко же и святых Апостол правила показуют. <…>

Но мы о Монастырском приказе, и о мирских судьях, и подобных сим, совопросниче, написали. Ты же, ответотворче, аще хощеши и с сущими с тобою тамо обретай. А еже в ответе своем пишешь: Пускай то бы было, что прежде сего не бывало Монастырскаго приказа или был, то подлинно наш всещастливый царь Алексей Михайловичь учинил, что привел к сущему делу, как тот, который любит лутчий порядок и умеет к доброму и достойному речи приводить паче иных надобрейший суть. Оправдания надобе, чтоб сидел судиа на своем месте, и слушал бы челобитья, и разсмотрял бы, которы имеет, и чия правда, и указ бы чинил добрых оправдать, а виноватых смирять тем же обычаем, что Бог благословит и венчает праведнаго и смиряет. Писано убо есть: разсыплет Бог кости человекоугодником, таковому, якоже тебе, глаголющему от своих. Богу свидетелствующу, а еже от ceбе глаголет, лжу глаголет. Где есть писано, ежебы царем, князем, и бояром, и дьяком, и судием патриарха, и митрополитов, и apxиeпископов, и епископов, и архиманритов, игуменов, и попов, и дьяконов, и причетников судить? В которых правилех писано, но паче судимым тем самем быти, а не судити. И еже убо патриарха судити, никоторыя правила устав в себе имут, аще вся изочтеши, разве не христианских и мучителских закон. А еже митрополита, кроме патрарха со инеми по 9-му правилу 4-го вселенскаго собора, епископа же, по правилу святаго Карфагенскаго собора, всея области епископом. Аще не будут вси, менши 12 да не будет. Пресвитера 6 епископов; диакона 3 причетника, епископ един. Ты же, по которым законом подтвержаеши устав оный беззаконный — в Монастырском приказе судити простым людям митрополитов, епископов, архимаритов, и игуменов, и попов, и дьяконов, и причетников. Такожде сего ж собора 20 правило повелевает и 150-е. О сем доволно есть показано ниже сего.

Паки пишешь: прошу, учинил ли коли нибудь таков суд Никон, сидел ли коли нибудь на своем судебном месте, чтоб слушал жалобы и зависти чьей нибудь? Николи! Толко он держал мирских, которые судили в его приказе и челобитныя роздавал людем своего двора и они никогда прямое кривым чинили, а кривое прямым. Так ли делают судии? Так ли патриархи к сыном своим, которые суть отцы отцем?

Речешь ми, правдотворче, и потязаеши нас, патриарха, что мы сидели ль коли нибудь на своем судебном месте, чтоб слушал жалобы чьей нибудь. Николи. Мы убо присно сидели на своем судебном столе, а тебя кто посадил на Божием месте, еже патриаpxa посуждати. И откуда еси ты, и по которым законом, нам судиею ставишися и глаголеши: так ли патриархи к сыном своим, которые суть отцы отцем? Како же ты, не суть отец отцем, но аще бы еси и православен был и яко сын, како бы мог отцу отцем законополагати. Правила святых отец не оставляют патриарший суд никому посуждати, не точно пришелцу, но ни всем епископом. Пришелцу же Божественныя правила запрещают в чуждей епископии учити или законополагати, и от сана измещут и ни во исходе жития причастником быти Христовых тайн. Святое же, священное Евангелие соблазн творящим камень жерновный повелевает таковым обязати о выи и повержену быти в море. <…>

… аще и царь есть сия законопреступаяй, повинен сам будет. А еже глаголешь, яко аз николиже сидел на своем судебном месте, чтоб слушал жалобы и зависти чьей нибудь, толко он держал мирских, которые судили в его приказех и челобитныя роздавали людем своего двора. И сие не без правды, еже мирским людям судиям быть под повелением патриаршим. Сие и у всех обретается, у митрополитов, епископов в Росии, обаче же патриаршеский уряд по закону мирских людей имать, яко же и Карфагенскаго собора показует правило 76. <…>

И по сим правилом узаконися и в патриаршеском судилищи мирским судиям и не без воли царской, но и от царска чина суть бояре и околничние, да егда прилучится суд от царска чина людем с церковным причетником, тогда не имут зазора рещи, яко патриарши судии судили одны и неправедно, но и от царска чина судьи, яко же той обычай и доднесь святая церковь держит, обаче с волею патриаршескою, прежде нас бысть и при нас такожде. Того ради и местницы и соглаголницы нарекошася, яко да могут в судища входити и цареви о таковых возвещати и оттуду помощь приимати, понеже по церковным законом не всегда мощно есть епископом к царю приходити. <…>

…Зде же в Росии не точию к царю приходити епископом или архимандритом и монахом, но ни на двор царский прощено есть. Всем убо еретиком, жидом, махаметом, и лютором, и калвином не возбранно приходити. Единым точию епископом православным, и архимандритом, и игуменом, и монахом приход на царской двор возбранен есть (20). А еже прямое кривым делать, а кривое прямым, я того не видал. Вижу ныне, что ты прямое кривишь, а кривое прямишь, Божественныя законы ни во что полагаешь, а новые свои несведомые святей церкви обновляеши и глаголеши: блажени алчющии и жаждущии правды, яко тии насытятся. Правда живет во веки, которая когда одна есть, то все может справедливый Господь, есть бо светлейший паче солнца. Bсе добродетельства имеют цари и патриархи для того, что они суть образцы всем, а наипаче правде, всех добрых дел царице, для чего старинные люди хотели словом одным все добрыя дела назвать правдою. Есть то истина, что блажени алчющии и жаждущии правды, яко тии насытятся. Почто же ты не взалкал, ни вжадался таковыя правды, но всюду чрез Божественные уставы враждуеши на правду, везде кривишь, якоже самыя твоя списания являют. И глаголешь: а что может наставливать государь архиманриты и всякия власти, то есть одно с привилей царских и извычай общих народов уряды роздавать. Солгал ты и зде, якоже везде лжеши, что с привилей царских извычай. Нигде есть о сем в царских законех, еже бы царем обирати епископов или архимаритов и прочих властей, но паче сопротивна во святых апостолских и святых отец правилех, такожде и царских законов. <…>

И елицы аще обрящутся избраны мирскими властели, Божественная правда не оставляет таковым бытии, но изверже. И избрали таковых, аще и царь будет, повинен есть епитемии, а иже от таковых избранных епископов поставлены, не суть поставлены, крещены, не суть христиане. О сем много есть писано выше сего, комуждо подобает знати и хранити своя меpa. Саул жертву вознес, царство погуби. Иозия покадив, опроказися. Аще царь есть, пребывай во своих уставех. Глаголеши ли, яко сердце царево в руце Божии. Тогда сердце царево в руце Божии, егда внутрь Божиих уставов пребывает. Тако Самойлом рек: яко уничижил еси глагол Господень и уничижит тя Господь, не быти тебе царю во Иизраили. Какоже ты глаголеши: не ищи от Господа власти, ниже от царя достоинства, пишет Сирах так. Ответ: не всяко тако пишет, есть инде, пишет той же Сирах: царь не наказан, погубляет люди своя. И Еклисиаст: горе тебе, граде, в нем же царь твой юн и князи твои рано ядят. Мерзость цареви творити злая, милость и истина сохранение царю и обыдет престол его в правду. Что имеет царь владение дати власть и честь. Имеет убо царь власть в своих ему данных от Бога уставох давати власть и честь мирским людем, а не епископом, и архимаритом, и прочимим властем, яко же и сам пишешь ты: яко которыя суть вышния, суд Божий, а которыя суть земныя, суд царский. И паки пишешь: для чего двоеглавый орел пишется, что он разширяется удостоинством церковным и мирским. Ответ: есть то правда, что царское величество разширился над церковию, чрез вся Божественыя законы, своим достоинством, а не законом коим любо Божиим, и не до сего точию ста, но и на самого Бога возгорде широтою орла, еже ныне издаде друком лист, лета от воплощения слова Божия 1663, на нем же есть написан орел двоеглавый, на орле же царь на коне, в гордости велицей зело, а свыше его на таблице написано, еже Соломон о Христе пророчествова, то царь на себя преписа. Писание ж се, Песни песней, глава 3: Дщери Cиони, взыдите и видите во царе Соломоне в венце, в нем же венча мати в день женитвы его. И другое писание, еже Исаия о Христове воцарении вечном глаголя: се Царь правдивый царствует. И паки другое писание: Аз воставих Царя с правдою и вси путие Его прави, Сей возградит град Мой и пленники люди Моих возвратит, ни по мзде, ни по дару. Рече Господь Саваоф, яко Мне поклонится всяко колено, и исповесться всяк язык, Богови глаголя: правда Иизраилева к Нему приидет и посрамятся вси отлучающеся от Господа. И се не о царе Алексее Исаия прорече, но о Царе царствующем, Господе Бозе и Спасе нашем, Иисусе Христе, о Нем же и Давид глаголет: рече Господь Господеви Моему: сиди одесную Мене; и паки: сел еси на престол, судяй правду; и паки: Господь судит людем, и паки — судит во языцех, исполнит падения, сокрушит главы на земли многим; и инде: Господь воцарися, в лепоту облечеся; и паки: предзрех Господа предо мною выну, яко одесную Мене есть, да ся не подвижи; сего ради возвеселися сердце мое и возрадовася язык мой, еще же и плоть моя вселится на упование. <…>

Ныне же вкратце речем, что есть царь правды. Добре! Седек бо правда глаголется, а Мелхи царь, убо Мелхиседек царь правды есть. Зриши ли во именах списание. Кто же есть царь правдивый, но разве Господь наш Иисус Христос. Царь Салимский царь мира сказуется, еже Салим, еже паки есть Христово. Сей бо нас праведных сотвори и умиротворил есть, яже на небесех и яже на земли. Кий же человек царь есть правды и мира, но разве Господь наш Иисус Христос. А иже, от пророчества поемля прореченное о Христе Бозе, приписуют себе: что чюдно сотворил любо! И во откровении Иоанна Богослова пишет: и слышах глас народа многаго, яко глас вод многих и яко глас громов крепких, глаголющи: аллилуя, яко воцарися Господь Бог наш, Вседержитель, радуимся и веселимся и дадим славу ему, яко прииде брак агньчи. Толкование: Глас народа и многих вод и громов являет проразителное и прослывущее в песнословии всех ангелских, небесных, безчисленных сил, яже нецыи воды разумеша сущия превыше небес, с ними ж и всяческое праведное исполнение славословит Создавшаго: воцари же ся Господь Иисус Христос, ими же естественне, яко Содетель, владычествова над сими, чрез человеколюбие воцарився, или по умному присвоению или по области царствует и судии подобающему. Брак же агньчи церковное, по Христу, совокупление и смешение, а не времени мира сего царю или князю обручена есть церковь, ея же строители Божественныя быша Апостоли, чрез них же ей обручение дадеся духовное, яко восприемлющии тогда лицем к лицу чистое и истое смешение. Сущее. И видех небо отверстое и се конь белый, и Седяй на нем, нарицаемый верный и истинный, и в правде судит и брань творит. Очи же Его пламень огненный и на главе его многия венцы. Толкование: Еже отверзену быти небеси, являет, яко с небесе приидет. Пришествие судиино, яко же зде завес сопрятание и согбвение судийское на земли, на повинных осуждение и изречение. Белый же конь знаменует святых светлость и веселие будущее, на них же Яздяй судит языки, очима своима пламенныма и огненныма, сиречь своею назирателною и разсмотрителною силою разделяя пламень огненный, праведным убо просветителный, но не опалителный, грешным же опалителный, но не просветителный. Многия же венцы или над всеми его царство сущими на небеси и на земли знаменуют, толикия бо, елики и во Ангелех чины и на земли скипетра и во святых человецех соборы и множества, или победу во всех строениих окрест нас на грешники чрез долготерпение, яко же глаголет Давид: и победиши, внегда судити. Сущее: и имать на ризе и на бедре своей имя написано: Царь царей и Господь господей. Толкование: имя же Царь царей являет Божественнаго вочеловечения неразсекомое, понеже Бог сый плотию пострада и человек сый царь царей есть воцарившихся над страстями и господь господей, стяжавших поспешением Христовым на грех достоинство и державу и сих, иже с Ним воцарятся в будущем веце. Сущее: и видех единаго Ангела, стояща в солнцы, и возва гласом велиим, глаголя всем птицам, парящим в средонебесии: приидитеся и соберитеся на вечерю великую, Божию, да снесте плоти царей, и плоти тысященачалников, и плоти крепких, и плоти коний, и седящих на них, и плоти свободных всех же, и рабов, и малых, и великих, и видех зверя и царя земныя и воинства их, собранная сотворите брань с Седящим на кони и с воинством Его. Толкование: воинствующая убо со диаволом воинства множественне именова за многораздирателное греха и разделенное. Сущее: и ят бысть зверь и с ним лжепрок, сотворивый знамения пред ним, иже прелсти приемшия начертание звериино и поклоняющияся образу его, жива ввержена будет оба в озеро огненое, горяще жупелом, и прочие убиены быша оружием Седящаго на кони, исходящим из уст его и вси птицы насытишася от плотей их. Толкование: и прочии убиены быша мечем Седящаго на кони, двема смертма сущема, первей убо разделению души и телесе, вторей же отсланию в геенну. Аще убо на воинствующих со антихристом возрим, слово да имать, яко первая смерть телесная предварит оружием Божиим, сиречь Того повелением, таже сице последовати имать вторая и благо бы имело; аще ли же ни, то и сии приобщатся со прелстившими я, вторая смерти вечныя муки, а еже насытитися птицам от плотей их по предъизданному и ныне восприяхом, к сему же зане, яко же глаголет некоим Исаием Бог: зане бысте ми в сытость, суще и святым всякое движение плотское безсластно есть и тяжестно и мерзостно. Смотрити же зде потреба велми опасно, како святии Ангели на себя Божественныя славы не восприемлют, по писанному: отдадите убо кесарева кесареви и Божия Богови. Не безбедно есть рабу царским себя чином, именем и достоянием почести, тако и царю не без муки, еже предпочитати самому себя и описоватися между Божественных таинств ветхаго и новаго заветов, разширяяся. Зри на устроение святых Ангел. Сущее: и падох под ногама Его поклонитися Ему и глаголет Ми: зри, ни клеврет бо твой есмь и братий твоих и имущих свидетельство Иисусово. Богу поклонися, свидетелство бо Иисусово есть дух пророчества. Толкование: глаголет Божественный ангел к Иоанну: ни клеврет твой есмь, ни кланяйся мне, яко будущая предглаголющему, исповедание бо сиречь свидетелство о Христе, си есть пророческаго духа подателно, темже не кланяйся мне, клеврету своему, но поклоняйся вся Содержащему и от сего смиренномудрию навыцаем святых Ангел, како не присвояют себе славу Божественную, по горким и убийственным бесом, но сию Создателю своему и Владыце приносят, яко да научимся и мы не преписовати на ся Божественную славу, глаголанную от Пророк и Апостол, ниже написоватися, разширяяся посреди Божественных таинств ветхаго завета и новаго, яко же есть написано в Библии Московская друку царское изоображение на орле и на коне гордо велми и с приписании пророческими иже о Христе пророчествоваша. Божественныя же таинства, древние и новые, Христовы крест и воскресение, ово, якож крест Христов то есть pacпятие мало превышено в тесноте и безславии, ово же, якоже воскресение Христа Бога нашего сточнил ceбе и славе своей, коню и орлу, ово же, яко же самаго Христа Бога нашего прениже всякоя своея славы и под ногама коня и орла и в тесноте некакой безславия. Ох, ох, увы, увы, люте, люте, в каковы времена достигохом! Збышася писанное: измениша бо славу Божию в славу человеческую и четвероногих скот и птиц. И паки другое писание: возлюбиша славу человеческую, нежели славу Божию. Сего ради предаст их Бог в страсти безчестия, во еже творити им волю языческу. И паки ино писание: безумие бо их явно будет всем. <…>

Паки: и вниде Давид и седе пред Господом и рече: кто есмь аз, Господи мой, Господи, или: что дом мой яко, возлюби мя до сего и согреших пред Тобою много, Господи мой, Господи, и что приложит Давид еще глаголати к Тебе: и ныне Ты веси, Господи мой, Господи, раба своего. И инде речеся: и благослови Господь царь пред всем множеством, и рече: благословен еси, Господи Боже Иизраилев, отец наших от века до века, Твое есть, Господи, величество и сила, и слава, и одоление, исповедание и крепость, яко Ты всем, иже на небеси и на земли владееши. От лица Твоего, Господи, исправится всяко царство и всяк язык, Тeбе бо, Господи, богатство и Тебе царство и величество во вся и во всяко начало, от Тебе богатство и слава, Ты всех начало, Господи; начало всякаго начала и власть в руку Твоею величество и царство всех, в руку Твою милость и вседержителство возвеличити и возрастити вся. Ныне убо, Господи Боже наш, исповедаемся Тебе и хвалим имя Твое преславное, кто есмь аз и кто людие Твои, яко возмогохом сия Тебе вся благовонне обещати. Твоя бо суть вся, и иже от руку Твоею прияхом, дахом Тебе, путницы бо есмы пред Тобою и пришелцы, яко же вси отцы наши, яко сень на земли — дние наши. Кто же есть мудрее Соломона, о нем же свидетелствова Господь Давыду, глаголя: и будет егда скончаются дние и уснеши со отцы твоими и восставлю семя твое по тебе, иже есть от чрева твоего и уготовлю царство Его и Той созиждет дом имени Моему и управлю престол Его до века и Аз буду Ему во отца и той будет Мне в сына. И царствуя Соломон, и возлюби Соломон Господа, и ходи в научениих давыдовых отца своего, ему Соломону явися Господь во сне и рече ему: проси, что хочеши и дам ти. И рече Соломон: аз есмь отрочище мал и не веде исхода своего и входа, раб же Твой посреде людей Твоих, яже избра люди многи, яко песок, иже при мори, его же никтоже не изочтет от множества, сего ради даждь рабу Своему сердце смыслено на послушание и суждение людем Твоим вправду, иже разумети посреди добру и злу, яко кто может судити людем Твоим тяжким сим. И угодно бысть слово се пред Господом Богом, яко испроси Соломон глагол и рече Господь к нему: занеже проси от Мене днии много и не проси богатства, ниже проси душа враг твоих, но испроси себе мудрости и разума, да послушаеши суда; се сотворих по глаголу твоему, се дах ти сердце смыслено и мудрость, есть был муж пред тобою и по тебе не восстанет подобен тебе, к сему, их же не проси, дах ти и богатство и славу, яко несть был подобен ти во царех по вся дни твоя, и аще ходиши по пути Моему и сохраниши заповеди Моя и повеления Моя, яко же ходи и Давыд, отец твой, умножу дни твоя. <…>